Potomitan

Site de promotion des cultures et des langues créoles
Annou voyé kreyòl douvan douvan

KREYOLAD 515

3ème Touw

11. Avril 2014

Jid

Ni an ti-pawol ka di: «Apré bal tanbou lou!» fout sa vré.

Es pa koté Senpiè Fayo ka dòmi trankil anlè dé zorèy li, memsi i ja pasé sentiron’y?

Lé perdan pa lé ped konsa é yo pòté plent, jik préfé a mélé. Manniè sa ka alé la-a, Adjilbè di mwen:

– Sa ni an lodè éleksion annilé!

Kom misié ni lang kabrit, nou ké atann pou wè si pou toulbon i ni rézon.

Pa koté Lawviè-Pilot sa cho toujou, Rémon té o doz MIM i di, i ni asé atjelman fok yo maché anlè’y pas i té ké pran trop kou.

Pa koté Sentàn ou sé di lapatri an danjé pas an patriyot tonbé bien malonetman. Maslen pa pran mas pou di  Chaben dé mo. Man tann li di:

– Sa inadmisib!

Asiparé komkidiré Garsen épi Chaben dépi nanni nannan, ni an ti-kochon ka nouri. Man tann di (pas man pa té la) i té ké monté fè konflérans kont Garsen dret an mitan Sentàn.

Adjilbè di mwen:

– Man ni lidé alians patriyot la, dwé vini tro séré an dwet serten. Savrè si yo pé ké anni tiré’y?

Es sa pa ka fè jé Parti Pou lé Minisipal la, ki ké an bè’y pou 2015?

Apré déziem touw la, vréman, vréman ou sé di ki anlot kanpàn ja koumansé. Man ka mandé es sé pa pou tout lo divizion-tala, Solanj pofité chapé an péyi san chapo. An militant kominis ki ja si djoubaté pou konba fanm, (menmsi ni yonn ki éli Baspwent), es i pa té simié fèmen zié’y pito, pas i pa té ka konprann ayen ankò épi lo alians silon van-tala?

Jid

crabe

Sommaire Kréyolad

 Viré monté